ԳՅՈՒՂԻ ՄԱՍԻՆ

Բիբլիական Արարատ լեռան հայացքի ներքո է գտնվում Մրգավան գյուղը: Մրգավան գյուղը (Գյոդակլու), որ կոչվում էր նաև Փոքր Դալուլար, 1831 թ. մտնում էր Երևան գավառի մեջ: Գյուղը 100 տարի հետո` 1927-1931 թթ. վերանվանվում է հեղափոխական գործիչ Ս. Մարտիկյանի անունով:
Այս տարի լրանում է գյուղի վերահիմնադրման 180 ամյակը: Գյուղը զբաղեցնում է 350 հա տարածություն: Բարձրությունը ծովի մակերևույթից 830 մ է:
Մրգավանի մասին գրել է Սերո Խանզադյանը իր << Հայրենապատում>> գրքում:

ՀԵՐՈՍԱՄԱՐՏ

Գեղամ Մինասի Խուդավերդյանը ծնվել է 1957 թ., սովորել է գյուղի միջն. դպրոցում: Ուսումը շարունակել է Երևանի թիվ 42 պրոֆ. ուսումնարանում և ստացել է որակյալ դերձակի կրթություն: 1975-1977 թթ. ծառայել է սովետական բանակում: 1980 թ-ին ամուսնացել է, ունի երեք երեխա` մեկ աղջիկ (Անի), երկու տղա (Վահե, Դավիթ): Զոհվել է 1992 թ. Երասխավանում:


Վաչիկ Սարգսյանը ծնվել է 1950 թ. Մրգավան գյուղում: Տեղի միջնակարգն ավարտելուց հետո աշխատել է որպես որմնադիր: Ամուսնացած է: Ունի երեք երեխա` Աշոտ, Գրիգոր, Աննա: Զոհվել է 1992 թ. Շահումյանի շրջանի Բուզլուխ գյուղում:

Նրանց անունները հավերժ կմնան ամեն մրգավանցու սրտում:

ՄՐԳԱՎԱՆԻ ՍՈՒՐԲ ՀԱԿՈԲ ԵԿԵՂԵՑԻ

XIX դարասկզբին, 1896 թվականին, Պարսկաստանից այստեղ ներգաղթել է մոտ 50 հայ ընտանիք: Եկեղեցին կառուցվել է 1902-05 թվականներին Խորեն արքեպիսկոպոս Մուրադբեկյանի /հետագայում`Խորեն Ա Կաթողիկոս/ կողմից հայ բնակչության խնդրանքով: Շինությունը պատկանում է գմբեթավոր դահլիճների տիպին, բաժանված է երեք նավի: Բեմն առանց հարդարանքի է: Եկեղեցու գմբեթը ներքուստ կլոր, արտաքուստ` բազմանիստ թմբուկով և վեղարով է: Պատուհանները կորագիծ են, պարզ, կամարակապ աղեղներով: Եկեղեցին ունի երկու մուտք` արևմուտքում և հարավային մասում, որոնք առանց դռների են: Արևմտյան շքամուտքին կից է զանգակատունը: Տարածքը ցանկապատված է: Եկեղեցին վերականգնվել է 1981 թվականին, Ամենայն Հայոց կաթողիկոս Վազգեն Առաջինի անմիջական աջակցությամբ:

Տեր Մխիթար քահանա Ալոյան
Արարատի մարզի Մրգավանի Սուրբ Հակոբ եկեղեցի

Տեր Մխիթար (ավազանի անունը՝ Օնիկ) քահանա Ալոյանը ծնվել է 1956 թվականի հունվարի
29-ին, Արտաշատի շրջանի Նորաշեն գյուղում: 1969 թվականին տեղի միջնակարգ դպրոցի 7-րդ դասարանն ավարտելուց հետո ընդունվել է Էջմիածնի Գևորգյան հոգևոր ճեմարան: 1974-76 թվականներին ծառայել է Խորհրդային բանակում: Զորացրումից հետո աշխատել է բանվոր շինարարական կազմակերպությունում, այնուհետև՝ գինեգործարանում, մանրահատակի գործարանում, նաև խանութում՝ վաճառող: 1978-89 թվականներին աշխատել է ՆԳ-ում, նախ որպես շարքային ծառայող, այնուհետև՝ Արտաշատի ՆԳ-ում, որպես շարքային անձնակազմի ավագ: 1989 թվականին Արարատյան Հայրապետական թեմի Առաջնորդական Փոխանորդ Տ. Գարեգին եպիսկոպոս Ներսիսյանի հրամանով ծառայության է անցել Արարատի մարզի Ս. Հակոբ եկեղեցում, որպես ուրարակիր:
1991 թվականին մեկնել է Ուրուգվայ, տեղի առաջնորդի հրավերով և ձեռնադրվել սարկավագ Սուրբ Ներսես Շնորհալի եկեղեցում: Վերադառնալով Հայաստան՝ Տեր Արսեն արքեպիսկոպոս Բերբերյանի ձեռամբ ձեռնադրվել է քահանա և ծառայել Գոշավանքում, ապա՝ Հաղպատ և Հաղարծին վանքերում, որպես վանահայր, նաև Դիլիջան քաղաքում, որպես հոգևոր հովիվ: Արսեն սրբազանի ԱՄՆ մեկնելուց հետո, նրա հրամանով նշանակվել է Գուգարաց թեմի առաջնորդ: 1995 թվականի նոյեմբերին տեղափոխվել է Արարատի մարզ և ծառայության անցել Մրգավանի Ս. Հակոբ եկեղեցում, որպես ծիսակատար քահանա: 2001 թվականի փետրվարին կրկին մեկնել է Ուրուգվայ և ծառայել Ս. Ներսես Շնորհալի եկեղեցում, այնուհետև 2001 թվականին վերադարձել Հայաստան: Այժմ ծառայում է Արարատի մարզի Մրգավան գյուղի Ս. Հակոբ եկեղեցում: Ամուսնացած է, ունի երկու որդի, մեկ դուստր, երկու թոռ:

ՄՐԳԱՎԱՆԻ ՄԻՋՆԱԿԱՐԳ ԴՊՐՈՑ

Մրգավանի դպրոցը հիմնադրվել է 1905 թ. (մեկամյա), 1908 թ. դարձել է երկամյա: Երկրորդ դպրոցը կառուցվել է 1930թ: Այն եղել է քառամյա, 1938 թ. դարձել է յոթնամյա, այնուհետև ութնամյա, միջնակարգ: Դպրոցի ներկայիս շենքը շահագործման է հանձնվել 1970 թվականին:
Մրգավանի միջնակարգ դպրոցն ունի երկու մասնաշենք` երկու և երեք հարկերով:Այն գտնվում է գյուղի կենտրոնում` Սբ. Հակոբ եկեղեցու և մշակույթի տան հարևանությամբ: Շենքի ընդհանուր մակերեսը 2853 մ2 է և նախատեսված է 640 աշակերտի համար: Ունի մեկ սպորտ դահլիճ: Դպրոցում կա համակարգչային դասարան, որը համալրված է ժամանակակից տեխնիկայով: Դպրոցամերձ տարածքի մակերեսը 11500 մ2 է. իսկ ուսումնաօժանդակ տարածքի մակերեսը 2500 մ2: Դպրոցն անվանակոչված չէ:
Տարբեր ժամանակներում դպրոցի տնօրեններ են եղել Խ. Բադալյանը, Ա. Եփրեմյանը, Ց. Հասրաթյանը, Ս. Ներսիսյանը, Վ. Բաբայանը, Գ. Գաբրիելյանը, Ս. Հարությունյանը (19761-1977թթ), Հ. Ղազարյանը (1978-1992թթ): Ներկայիս տնօրենն է Ս. Շահբազյանը:
Դպրոցը տվել է բազմաթիվ անվանի շրջանավարտներ` Հ. Բադալյանը, Մ. Գրիգորյանը, Գ. Մարգարյանը, Տ. Պետրոսյանը, Գ. Ավագյանը, Ն. Ավագյանը, Ռ. Հարությունյանը, Թ. Թադևոսյանը, Կ. Կոստանյանը և այլք:
2009-2010 ուստարում դպրոցի կոմպլեկտավորված 12 դասարաններում սովորում են 220 աշակերտներ: Դպրոցում դասավանդում են 24 ուսուցիչներ (19 բարձրագույն և 5 միջնակարգ կրթությամբ), վարչական աշխատողների թիվը 3-ն է, իսկ ուսումնաօժանդակ աշխատողներինը`13:
Գործող տնօրենն է Սարգիս Վաչիկի Շահբազյանը: